Wü över uns

Dat Theaterspäln is’n lange Tradition in’n MTV Jahn von 1908 Obermarschacht. Woll siet de Verein in’t Joahr 1908 gründ’t worden is, is ok woll al Theater spält worden. Öber de Tradition is nich glatt aflopen. Ümmer wedder sünd Krieg un slechte Tieden komm’n, wo de Lüüd einfach nich de Sinn na Theaterspäln stünn. Denn hett dat öfters ok an Lüüd fählt, de sick jedes Joahr wedder tau ein neies Stück tosamen funnen hebbt.

In dat Joahr 1978 – as de Verein sien 70jähriges Jubiläum fiern wull – doar hett uns 1. Vorsitzende Claus-Dieter Mordhorst meent, dat weur doch tau schön, wenn tau dat Jubiläum ein Theaterstück upfeuhrt warr’n kunn. Un de Gedanke is gaud upnahmen worden, un bald harrn sik denn ok naug Lüüd funnen, de mitmaken wulln. De Luhdörper Theaterspälers hebbt uns up’n Weg holpen mit ein’n Vörslag von ein schönes Lustspill un hebbt gaude Ratsläg gäben. Un so güng dat Studieren denn los, un an’n 10. Oktober 1978 weur denn de eerste Upfeuhrung. De Taukiekers weurn taufräden und de Spälers ok.

Un dat nächste Joahr weurn denn würklich alle Spälers wedder mit doarbi ein neies Stück intaueuben. Ja, un woahrhaftig – dat nächste Joahr wed-der un so wieder un so wieder .. un nu sünd all 30 Joahr vergahn! Jedes Joahr geiw dat ein neies Stück – dat weur ein Barg Arbeid – aber hett ok ümmer Spaß maakt. So könnt de Spälers dankboar up düsse Tied trüchkie-ken.

Dank schall ok seggt warr’n all de Lüüd, de nebenbie holpen hebbt, dat de Upfeuhrungen geling’n kunn’n – an Gasthaus Ahrens för dan’n Saal - an Claus-Hermann Zeyn, dat hei ein’n Ruum gäben hett, wo de Kulissen un alle Utensilien lagert warr’n könnt.

Doar schall öber ok nich vergäten warr’n, dat glieks na de Wende 1989 dörch de Vermittlung von Heinz Koopmann un den’n groten Insatz von Jürgen und Christa Niederhoff ein Theaterupfeuhrung in Neihuus möglich weur. Wat weur dat uprägend und wat weur doar vörher allns tau beden-ken, aber dat weur ein wunnerboares Erlävnis! Un ok doarhen sünd de Spälers jedes Joahr wedder feuhrt – bit hüüt – un hebbt doar ein wunnerboares Publikum funnen. Dor wü siet düt Joahr bi Alfred in Stapel nich mehr spelen künnt, spelt wü nu in Laave, dat is man 3 Dörper wieder. Un siet drei Joahr gifft dat ok Upfeuhrungen in Tessin bi Boizenborg in Mäckelborg. Vergäten warr’n schöllt ok nich de Upfeuhrungen bi de Adventsfiern vun de Landfrauen – tauerst in Amelinghusen und denn in Radbrauk.

Tja, so kann denn de Theatergrupp up bewägte 30 Joahr trüchkieken un Dank segg’n an de Lüüd lang’s den Elvdiek un vun Binnenlann’n, dat se ümmer treu komm’n sünd, jedes neie Stück antaukieken.